Menntaskólinn að Laugarvatni

Skólasamningur 2010-2012

 

1.  Tilgangur

Samningur þessi er á milli mennta- og menningarmálaráðuneytis (ráðuneyti) og Menntaskólans að Laugarvatni (ML) í samræmi við 2. mgr. 44. gr. laga nr. 92/2008 um framhaldsskóla.

Hann kveður á um helstu áherslur í starfsemi ML og önnur mikilvæg atriði sem snerta þjónustu og rekstur skólans. Auk þess er hann umgjörð um samskipti og upplýsingamiðlun aðila. Tilgangurinn er að stuðla að metnaðarfullri og markvissri framþróun í starfsemi skólans.

Samningurinn hefur ekki áhrif á ábyrgð mennta- og menningarmálaráðherra gagnvart Alþingi á starfsemi skólans eða lögbundnar skyldur hans og takmarkar ekki stjórnunarheimild ráðherra.

2.  Áherslur

Sá kafli sem hér fer á eftir lýsir markmiðum skólans við upphaf samningstímans. Ráðuneyti leggur áherslu á að efnahagsaðstæður við undirritun samningsins setja skólum þröngar skorður þar sem niðurskurður ríkisútgjalda er fyrirsjáanlegur. Því gætu sum þeirra markmiða, sem hér eru sett, þarfnast endurskoðunar í ljósi aðstæðna. Kaflinn er opinn til uppfærslu og verða markmiðin rædd á fundum aðila á haustmánuðum og kaflanum breytt ef þurfa þykir.

Helstu áherslur og markmið á samningstímanum eru:

Markmið skólans eru að

• einkunnarorð hans, manngildi – þekking – atorka, séu ávallt þau grundvallarviðmið sem allt starf skólans byggir á með einhverjum hætti.

1. Orðin manngildi – þekking – atorka er þýðing Baldvin Einarsson á orðinu „humanismus“

• Manngildi:  Skv. orðabók Mál og menningar (1993) er það skilgreint sem mannkostir, innra gildi mannsins, skapgerð, lyndiseinkunn.
  • Það er erfitt að mæla með hlutlægum mælikvörðum.  Segja má þó að þar sem námsmat skuli þróast í m.a. mat á færni og hæfni muni það um leið meta að einhverju leyti manngildi.
  • Þekking:  Skv. sömu orðabók er það skilgreint sem kunnátta, það að vita, kunna skil á, greind, skilningur.
    • Þekking er metin í námsmati.
    • Atorka:  Skv. sömu orðabók er það skilgreint sem dugnaður, táp, framtak (og atorkusamur sem eljusamur, ötull, fylginn sér, duglegur).
      • Atorka er m.a. metin í námsmati s.s. í huglægu miðannarmati en einnig má meta hana með könnunum.
• reka skólann á fjárlögum ár hvert.
• bjóða upp á fjögurra ára nám á tveimur brautum til stúdentsprófs, á náttúruvísindabraut og félagsvísindabraut.
• hugað verði að skilgreiningu framhaldsskólaprófs fyrir þá sem ljúka umtalsverðu námi án þess að stefna beint á stúdentspróf.
• kynna nám í skólanum í grunnskólum á Suðurlandi með það í huga að laða að nemendur sem uppfylla inntökuskilyrði skólans.
• nemendafjöldi verði sem næst 160 í skólanum.
• laða að vel menntaða og hæfa framhaldsskólakennara til starfa þegar nýliðunar er þörf. Starfsmannastefna skólans er á heimasíðu hans, ml.is/starfsmannastefna.
• sinna sjálfsmati í samræmi við sjálfsmatsáætlun eins og hún er hverju sinni.
• endurskoða sjálfsmatsáætlun árlega.
• vinna áfram að góðu samstarfi við sveitarfélag og nærumhverfi svo og aðrar menntastofnanir í Bláskógabyggð.
• að styðja vel við nemendur skólans sem eru með annað móðurmál en íslensku.
• að styðja eins og kostur er við þá nemendur skólans sem eiga í vanda með einstakar námsgreinar s.s. með stoðtímum og sjálfstyrkingu.
• styðja við íþróttastarfsemi nemendafélagsins Mímis og viðhalda góðu samstarfi við ungmennafélag staðarins, Ungmennafélag Laugdæla.
• viðhalda samstarfi samkvæmt samningi við Landsbjörgu og Björgunarsveitina Ingunni, á grundvelli útivistaráfanga skólans.
• að jafnræðisreglunnar og meðalhófsreglunnar sé gætt í hvívetna við stjórnun skólans.
  • Hlutlægt mat á árangri fæst með könnunum meðal starfsmanna og nemenda.
• að stjórnun sé lýðræðisleg og í samræmi við lög og reglugerðir um stjórnsýslu opinberra stofnana.
  • Hlutlægt mat á árangri fæst með könnunum meðal starfsmanna og nemenda.

Aðalmarkmið ML

	Að búa nemendur undir framhaldsnám		Að búa nemendur undir þátttöku í lýðræðisþjóðfélagi

 

Þessu markmiði hyggst skólinn ná með því að:

Þessu markmiði hyggst skólinn ná með því að:

	Ástunda fjölbreytt og skapandi skólastarf Leggja áherslu á krefjandi nám á öllum sviðum Leggja áherslu á vönduð vinnubrögð, gagnrýna hugsun og notkun upplýsingatækni Leggja áherslu á að nemendur æfist í lestri fræðilegs texta Vinna að því að efla sjálfsaga nemenda Leggja áherslu á að einstaklingar vinni fjölþætt verkefni í einstaklings- og hópavinnu og þjálfist í að kynna þau Efla eftir megni færni nemenda í notkun íslensks máls		Skapa þroskandi og uppbyggilegan ramma um skólastarf og félagslíf Leggja áherslu á eflingu sjálfstrausts, siðferðisvitundar og umburðarlyndis Ýta undir heilbrigðan lífsstíl og vinna að markvissum forvörnum á öllum sviðum Ýta undir áhuga nemenda á umhverfinu og verðmætum þess Efla og viðhalda þekkingu á og virðingu fyrir menningarverðmætum Vinna að því að auka ábyrgð nemenda í samfélaginu, á sjálfum sér og í samskiptum við aðra

Leið: Kennsla og nám                                                   Hlutlægt mat á árangri: Námsmat

Leið: Umhyggja, festa, skipulag. Kennsla og nám. Hlutlægt mat á árangri: Kannanir lagðar fyrir nemendur, foreldra, kennara og stjórnendur. Námsmat.

3.  Samskipti, fundir, eftirfylgd

Samningsaðilar munu leitast við að styrkja samninginn sem umgjörð um formleg samskipti þeirra enda geri lög, reglugerðir og önnur stjórnvaldsfyrirmæli ekki ráð fyrir öðru. Eftirfylgd er ekki síður mikilvæg en samningurinn sjálfur og mun hluti hennar felast í þróun aðferða við að meta og bera saman árangur skóla.

Samskiptahættir

Aðilar eru sammála um að þær meginreglur gildi í samskiptum þeirra, formlegum sem óformlegum að unnið sé í góðri trú og traust ríki milli þeirra.

Umfjöllun sé málefnaleg og vinnulag einkennist af gegnsæi og skjótum viðbrögðum. Samvinna sé eftir föngum um lausn mála og hagsmuna nemenda gætt í hvívetna.

Formlegir samráðsfundir

Reglulegir fundir ML og ráðuneytis á samningstímanum eru a.m.k. tveir á hverju ári. Á haustfundum koma fulltrúar ráðuneytis í skólann en á vorönn sækja fulltrúar skólans fund í húsakynnum ráðuneytis. Öll mikilvægustu mál sem varða skólann og báðir aðilar þurfa að fjalla um eru rædd á fundunum og komið í farveg sem leiðir til niðurstöðu. Fundirnir þjóni þó fyrst og fremst þeim tilgangi að fara yfir samninginn og áherslur aðila skv. kafla 2 og meta sameiginlega hvernig tekst að fylgja þeim eftir.

Farið er yfir verk- og framkvæmdaáætlun skólans um innra mat og framgang hennar og niðurstöður matsins, þ.e. þeirra þátta sem unnið er að hverju sinni. Jafnframt er fjallað um niðurstöður ytra mats og kannana, ef um slíkt er að ræða, svo og annarra eftirlitsþátta.

Á vorfundi liggur fyrir árskýrsla skólans til umræðu en á haustfundi er skýrsla skólans um innra mat á liðnu skólaári tekin fyrir. Þá getur ráðuneyti óskað eftir framvinduskýrslum eftir atvikum.

Einnig eru tekin fyrir fjármál og rekstur skólans og sérverkefni ef einhver eru skv. kafla 5 sem og helstu breytingar á starfi skólans.

Þá eru önnur mál tekin fyrir til úrlausnar eftir því sem þarf.

Dagskrá fundanna skal liggja fyrir með minnst viku fyrirvara.

4.  Forsendur skólastarfsins

Í þessum kafla er rætt um hvernig haga þarf nokkrum þáttum í starfsemi skólans svo hægt sé að vinna eftir samningnum og uppfylla ýmsar skyldur sem hvíla á aðilum hans, meðal annars samkvæmt lögum.

Hlutverk og skipulag

Við skólann eru starfræktar tvær bóknámsbrautir til stúdentsprófs, félagsfræðabraut og náttúrufræðabraut. Um er að ræða fjögurra ára nám, sem miðar að því að veita nemendum góðan undirbúning fyrir framhaldsnám. Skólinn starfar samkvæmt bekkjakerfi og þessvegna er námsferill nemenda að mestu leyti fyrirfram skipulagður fyrir öll fjögur árin, og fylgir því brautaskipulagi sem tilgreint er í námskrá fyrir framhaldsskóla frá 1999. Þrátt fyrir tiltölulega lítið svigrúm til að velja mismunandi leiðir að stúdentsprófi, geta nemendur valið, bæði innan skólann og einnig í fjarnámi við aðra skóla, áfanga sem bæði geta styrkt og dýpkað það bóklega nám sem í boði er, og einnig verklega áfanga, sem stuðla að aukinni færni til að takast á við daglegt líf til framtíðar. Hér er sérstaklega við hæfi að tilgreina fjóra, 2e áfanga í útivist, sem nemendur geta valið á fyrstu tveim árunum í skólanum.  Eins er að jafnaði boðið upp á valáfanga í matreiðslu, fatagerð og myndlist.

Það hefur ávallt verið eitt megin markmið skólans að leggja mikla áherslu á móðurmálið og í núverandi vinnu að skipulagi námsins til framtíðar er þessu markmiði haldið til haga. Þá hefur skólinn getað státað af öflugu raungreinanámi, og þar verður í engu slakað á.

Auk skólameistara starfar við skólann aðstoðarskólameistari í 80% starfi.  Námsráðgjafi er í 50% starfi, bókasafnsfræðingur í 80%, skólaritari í 80% og umsjónarmaður fasteigna í 100% starfi.

Kennarar skólans eru á bilinu 16-18, flestir gegna 100% starfi og allir fastir kennarar eru með réttindi sem framhaldsskólakennarar.

Aðrir starfsmenn skólans, þeir sem sinna ýmisskonar störfum við heimavist, þvottahús og mötuneyti, í mismiklu stöðuhlutfalli, eru 15.

Skipurit skólans er að finna í fylgiskjali.

Með því að nemendur skólans búa langflestir á heimavist, skapast umgjörð sem ótvírætt stuðlar að alhliða félagslegum þroska. Með því að dvelja í heimavistarskóla verður til sérlega uppbyggilegt millistig milli æskunnar í foreldrahúsum og sjálfstæði á ábyrgð sem fullorðnir einstaklingar þurfa að tileinka sér.

Skólinn lítur ekki síst á starf sitt sem alhliða undirbúning ungs fólks fyrir framtíðina. Að þessu er unnið bæði með rekstri heimavistar þar sem nemendur þjálfast í flestum þáttum sem lúta að samskiptum við aðra, s.s. tillitssemi, samkennd, ábyrgðarkennd og umburðarlyndi. Í náminu er lögð áhersla á að efla sjálfstæði nemenda, skipuleg vinnubrögð, jafnrétti, lýðræðisleg vinnubrögð, gagnrýna hugsun, svo eitthvað sé nefnt.

Auk þeirrar þjónustu sem nemendur fá frá skólanum sem hluta af námi sínu, er starfrækt mötuneyti við skólann, þar sem bornar eru fram 4 staðgóðar og hollar máltíðir á dag, og þvottahús, sem veitir þjónustu sem tekur fram flestu því sem nemendur eiga að venjast. Markmið skólans með svo öflugri stoðþjónustu sem hér er um að ræða, er að skapa svigrúm fyrir nemendur til að einbeita sér að námi sínu og og félagslegum þroska.

Skólanámskrá

ML gefur út skólanámskrá í samræmi við 22. og 23. grein laga um framhaldsskóla og almennan hluta aðalnámskrár. Skólanámskráin er sá grunnur sem byggt er á þegar mat er lagt á gæði skólastarfs og árangur af því. Stefna skólans er því sett fram og útfærð í almennum hluta hennar á þann hátt að meta megi hversu vel skólanum tekst að framfylgja henni. Þar er einnig gerð grein fyrir nánari útfærslu á hlutverki skólans sem og stefnu skólans í forvörnum, móttöku erlendra nemenda, námsúrræðum fyrir nemendur með leshömlun og öðrum lögbundnum skyldum. Hinn hluti skólanámskrár fjallar um námsbrautarlýsingar og eru þær háðar staðfestingarferli ráðuneytis.

Innleiðing nýrra námsbrauta

ML þróar eftirtalið nám og námsbrautir inn í viðmiðaramma ráðuneytis.

Hér er í vinnslu hjá stýrihópi um stefnumótun skólans aðalmarkmið hans og svo markmið brauta.  Ákveðið hefur verið að bjóða upp á tvær brautir með víðfeðmari nálgun en er í dag.  Nöfn þeirra eru í mótun en upp hafa komið hugmyndir um umhverfis- og náttúruvísindabraut og félags- og hugvísindabraut.  Innra skipulag þeirra er í mótun hjá stýrihópi.  Einnig er stefnt að meira vali á efri árum og aukinni skörun milli brauta.  Gert er ráð fyrir aðgreiningu á brautir strax á fyrsta ári.  Sjá kaflann Þróunarverkefni bls. 6.

Þróun náms og námsbrauta er unnin í samvinnu og samráði við ráðuneyti og veitir það aðstoð og upplýsingar í þróunarferlinu. ML fer eftir þeim viðmiðum, sniðmátum og reglum sem settar eru við framsetningu námsbrauta. Gert er ráð fyrir að staðfestingarferli ráðuneytis taki til framsetningar og uppbyggingar námsbrautar, staðsetningar á hæfniþrep og fjárhagslegs svigrúms til rekstrar námsbrautarinnar.

Innritun/inntaka

ML nýtir sameiginlegt innritunarkerfi fyrir framhaldsskólana sem ráðuneyti rekur. Skólinn sér um að opna fyrir umsóknir og innritar á sameiginlegum innritunartíma einu á ári sem ráðuneyti ákveður en ræður að öðru leyti hvenær hann tekur við umsóknum. Ráðuneyti gefur út nánari viðmiðunarreglur og tímaramma um meðferð umsókna.

Skólinn innritar nemendur sem uppfylla inntökuskilyrði hans.  Vegna námsskipulags skólans og það að hann er heimavistarskóli í dreifbýli gilda eftirfarandi reglur um innritun:

Forgang hafa:

1. nemendur sem koma beint úr grunnskóla
2. aðrir nemendur
3. ef aðsókn er meiri en skólinn getur brugðist við er horft til skólaeinkunna

Skv. reglugerð ráðuneytis skulu a.m.k. 45% nýnema inn á fyrsta ár vera frá heimasvæði skólans sem er skilgreint sem allir grunnskólar á Suðurlandi

 

Inntökuskilyrði ML eru að grunnskólaeinkunnir nýnema séu að lágmarki:

 

	FÉ	NÁ
Íslenska	6	6
Enska	5	5
Danska	-	-
Samfélagsgreinar	6	-
Stærðfræði	5	6
Náttúrufræði	-	6

 

Innra og ytra mat

Markmið innra mats og ytra mats er að auka gæði náms og skólastarfs.

Kerfisbundið innra mat skóla á árangri og gæðum fer eftir 41. gr. laga um framhaldsskóla, reglugerð á grundvelli 42. gr. laganna og ákvæðum í almennum hluta aðalnámskrár framhaldsskóla.

Við matið er gengið út frá markmiðum í skólanámskrá, þau gerð mælanleg eða fundnar áreiðanlegar vísbendingar um að starfið sé í samræmi við markmið.

Matið er umbótamiðað, skýrsla er gerð um þá þætti sem eru metnir hverju sinni og greint opinberlega frá helstu niðurstöðum og umbótum í kjölfarið, þar á meðal í ársskýrslu skólans til ráðuneytis.

Matsskýrsla er ein af helstu undirstöðum ytra mats og á að vera aðgengileg ráðuneytinu á rafrænu formi.

Skólinn gerir ráðuneyti grein fyrir verk- og framkvæmdaáætlun um innra mat til næstu þriggja ára. Áætlunin greini meðal annars frá sjálfsmatsaðferð skóla og þáttum sem koma til mats á hverju ári. Hún er endurskoðuð árlega og einu ári bætt við þannig að ávallt séu þrjú ár undir. Skólinn kynnir ráðuneyti nýjustu áætlun hverju sinni og er miðað við að hún verði fylgiskjal með samningnum. Hann greinir frá framvindu áætlunarinnar í ársskýrslu og er hún rædd á fundum um skólasamninginn, hann leggur fram gögn og greinir frá dæmum sem útskýra hversu virkt sjálfsmatsferlið er.

Ytra mat ráðuneytis fer eftir 42. gr. laganna og reglugerð sem sett er á grundvelli hennar. Ráðuneyti gefur árlega út áætlun til þriggja næstu ára um ytra mat (úttekt) á framhaldsskólum sem kynnt er á fundi um skólasamninginn. Þegar niðurstaða ytra mats á skólanum liggur fyrir er hún rædd á fundi með fulltrúum hans.

Upplýsingamiðlun

ML nýtir sameiginlegt háhraðanet „FS-net“ með öðrum framhaldsskólum og símenntunarmiðstöðvum og eiga skólarnir fulltrúa í stjórn netsins sem sér um rekstur, viðhald og ákveður gjaldskrá.

Ráðuneyti rekur gagnagrunninn og vefþjónustuna Skinnu sem er ætlað að safna tilteknum upplýsingum frá framhaldsskólum og gera ráðuneyti þannig kleift að uppfylla lagalegar skyldur sínar um eftirlit.

ML skilar inn þeim gögnum sem ráðuneyti óskar eftir í samræmi við 55. gr. laga 92/2008 og reglugerð um söfnun upplýsinga.

Ráðuneyti vinnur að því að þróa nýjan námskrárgrunn með viðmóti fyrir skólana og munu þeir sjá um að setja inn brautarlýsingar og skila inn áfangalýsingum eftir því sem reglur segja til um.

Einnig sjá skólar um að setja upplýsingar hver um sinn skóla og það nám sem boðið er inn í nýja Menntagátt og rafræna upplýsingavefinn Nám að loknum grunnskóla. Stefnt er að því að þessi gögn verði samkeyrð og jafnvel tengd vefsíðum skólanna.

Fjármál, rekstur

Lög nr. 88/1997 um fjárreiður ríkisins kveða meðal annars á um gerð fjárlagafrumvarps, bókhald og ársreikning og um framkvæmd fjárlaga. Reglugerð nr. 1061/2004 kveður ásamt fleiri reglugerðum á um framkvæmd fjárlaga. Fjárlög eru sett fyrir eitt ár í senn og ber forstöðumönnum að virða fjárheimildir.

Ráðuneyti skilar fjárlagatillögum vegna framhaldsskóla til fjármálaráðuneytis og annast samskipti við Alþingi vegna fjárlagagerðar eftir því sem ríkisstjórnin ákveður. Fjármálasvið ráðuneytis annast þessi mál í samvinnu við skrifstofu menntamála. Framhaldsskólar skila upplýsingum vegna fjárlagagerðar til ráðuneytis, meðal annars um nemendatölur. Fjárlagatillögur ráðuneytis vegna skóla geta byggst á eftirfarandi, enda þótt hver skóli fái ósundurgreinda fjárveitingu í fjárlögum:

• Reglugerð nr. 335/1999 um reiknilíkan til að reikna út kennslukostnað framhaldsskóla og líkaninu sjálfu sem uppfært er árlega. Frá og með árinu 2010 tekur líkanið ekki til húsaleigu.
• Leigusamningum skóla við Fasteignir ríkissjóðs sem ráðuneytið hefur staðfest áður en fjárlagafrumvarp liggur fyrir.
• Óski skóli eftir framlagi vegna annarra leigusamninga þarf að ná niðurstöðu um slíkt við ráðuneytið.
• Sérstökum verkefnum skóla samkvæmt 5. kafla samningsins.
• Skólinn skilar ráðuneytinu áætlunum og upplýsingum í samræmi við reglugerð um framkvæmd fjárlaga og eftir því sem nánar er ákveðið. Hann færir fjárhagsbókhaldið í bókhaldskerfi ríkisins og ber skólameistari/rektor hans ábyrgð á fjárreiðum skólans og að bókhaldið sýni rétta fjárhagsstöðu á hverjum tíma.

Unnið er að samningum ráðuneytis við Fasteignir ríkissjóðs og fjármálaráðuneyti þar sem stefnt er að samræmi milli framlaga til skóla og útgjalda þeirra vegna húsnæðis. Við undirritun er ekki ljóst hvernig því miðar en samningur þessi verður uppfærður um leið og niðurstöður fást.

Fermetratala skólans er:   3.257

Fermetratala heimvistar er: 5.108

5.  Sérstök verkefni skólans

Um er að ræða annars vegar sérstök rekstrarverkefni sem skóli tekur að sér og skal þá aðgreina rekstrarútgjöld og rekstrartekjur vegna þeirra frá öðrum rekstri í bókhaldi skólans. Hins vegar er um að ræða þróunarverkefni sem njóta styrkja úr sjóðum ráðuneytis og gerður er sérstakur samningur um.

ML stendur að eftirtöldum verkefnum:

Rekstrarverkefni: Rekstur heimavistar með allri stoðþjónustu s.s. mötuneyti og þvottahúsi.  Nemendur greiða leigu vegna herbergja sinna á heimavistum og er notkun þvottahúss innifalin í þeirri leigu.  Mötuneytið sér um innheimtu leigu nemenda í gegnum viðskiptamannabókhald sitt og skilar þeim tekum annarlega til skólans sem aftur skilar þeim til Fjársýslu ríkisins.  Þrír starfsmenn sjá um vistargæslu undir stjórn húsbónda í umboði skólameistara.  Mikil áhersla er lögð á gott utanumhald heimavistarmála.  Skýrt regluverk er í kringum það, vinnuferli og eftirfylgni mála er skýrt.  Leigutekjur heimavista skólaárið 2008-2009 voru um kr. 10 m.  Nemendur greiða hráefnis- og launakostnað mötuneytisins en það er sjálfseignarstofnun, með sér kennitölu, undir yfirstjórn skólanefndar.  Mötuneytið er rekið á núllgrunni.  Skólameistari er framkvæmdarstjóri en bryti sér um daglegan rekstur og ráðningarmál.  Gjaldkeri sér um viðskiptamannabókhald, launabókhald og rekstrarbókhald.  Sex starfsmenn vinna við mötuneytið að gjaldkera meðtöldum (5,8 stöður) og tveir í þvottahúsi (1,5 staða).   Velta mötuneytisins skólaárið 2008-2009 var tekjur upp á um kr. 56 m. en gjöld upp á um 50 m. kr.   Skólinn sér einnig um rekstur og leigu á starfsmannahúsnæði í eigu skólans.

Þróunarverkefni: Verkefnið „Hvert skal stefna?“ fjallar um stefnumótun skólans.  Vinna við verkefnið hófst fyrir tæpu ári.  Ráðgjafafyrirtækið Capacent kom að vinnunni í byrjun.  Stýrihópur starfsmanna skólans undir stjórn skólameistara heldur utan um verkefnið og miðar vinnu eðlilega áfram.  Fundað er hálfsmánaðalega og að jafnaði vinna einstaklinga milli funda.  Þess utan eru vinnubúðir a.m.k. tvo daga á önn.  Mennta- og menningarmálaráðuneytið styrkir verkefnið um kr. 820 þús.

6.  Gildistími, endurskoðun

Samingur þessi er gerður til þriggja ára og gildir frá 1. janúar 2010.

Farið skal yfir framkvæmd þessa samnings reglulega á gildistímanum sbr. 3. kafli og gert ráð fyrir hann sé endurskoðaður árlega og uppfærður að loknum vorfundi ár hvert.

7.  Fylgiskjöl samningsins

Verk- og framkvæmdaáætlun um innra mat

Almennur hluti skólanámskrár sem inniheldur stefnuskrá skólans, starfsmarkmið, starfsáætlun – vefslóð

Reiknilíkan – eintak skólans í excelskjali

Skýrslur – innra mat, árskýrsla – Sjá skýrslu

Listi yfir námsbrautir

Skipurit