Menntaskólinn að Laugarvatni

Og það er vatnsslagurinn

Details: Skrifað maí 16 2017

Sú var tíð, að nemendur fundu hjá sér einhverja þörf til að sleppa fram af sér beislinu á prófatíma í maí með því að fara í vatnsslag. Það fór allt úr böndunum og innviðir heimavistarhúsanna urðu fyrir meiri áþján en hægt var að una við. Því var það að Pálmi beislaði þessa innibyrgðu þörf með því að skipuleggja vatnsslag á tilteknum stað á tilteknum tíma. Það sem meira var, hann útvegaði slökkviliðsbíl, ef hann var ekki í notkun, tengdi hann við brunahana, lagði tvær brunaslöngur í tunnur úti á túni og skrúfaði frá. Þar með hófst tími hins skipulagða vatnsslags, sem hefur fest sig rækilega í sessi. Í gær var, sem sagt, árlegur vatnsslagur haldinn með pompi og prakt á túninu fyrir vestan Kös.
Ekki verður annað séð, en að ungdómurinn hafi haft nokkuð gaman af eins og venja er til.
Ekki var mikið um nýjungar, en þó bar það við, að bjartsýnismaður fór í slaginn með regnhlíf, væntanlega til að komast hjá því að vökna, en ef hægt er að vera viss um eitthvað, þá er það það, að ef maður tekur þátt í vatnsslag, þá verður maður blautur. Þar skiptir regnhlíf harla litlu máli.

pms

MYNDIR

Dimissio 2017

Details: Skrifað maí 16 2017

Á föstudaginn var var síðasti kennsludagur í skólanum á þessu skólaári og jafnframt dagurinn þegar stúdentsefnin eru "send burt", eða þannig. Þessum degi gleymir þetta unga fólk seint, enda fátt skemmtilegra en fá að upplifa þá einstöku blöndu gleði og eftirsjár sem deginum fylgir. Framundan er heimur fullorðinna með allri sinni ábyrgð, að baki æskan og áhyggjuleysið.

Þessi dagur var með sama hætti og svona dagar eru yfirleitt í þessari fyrirmyndarstofnun: fastar hefðir gilda nánast um hverja mínútu og ekki ástæða til að lýsa því öllu í smáatriðum. Þó svo sá sem þetta ritar hafi, aldrei þessu vant, ekki verið á staðnum, fékk hann að hlutverk að segja frá honum á þessari síðu. Það má deila um réttmæti þess, en það verður að sjálfsögðu ekki gert hér.

Dagurinn var fólkinu til sóma og honum lauk með hátíðarkvöldverði dimittenda og læriforeldra.

pms

Fleiri myndir

Fyrirmyndarstofnun 2017

Details: Skrifað maí 15 2017

Við í Menntaskólanum að Laugarvatni erum afar stolt af því að hafa hlotið nafnbótina "Fyrirmyndarstofnun 2017" á uppskeruhátíð SFR / Stofnana bæja og borga / Stofnana ríkisins s.l. miðvikudag. Erum í 5. sæti í flokki meðalstórra stofnana hvar 45 stofnanir tilheyra. Meðfylgjandi merki höfum við því rétt á að nota út árið.

Sjá: www.sfr.is