Fjör í fjölmiðlafræði - vettvangsferð

Details

Skrifað janúar 30 2018

Nemendur í fjölmiðlafræði við Menntaskólann að Laugarvatni ásamt Freyju Rós Haraldsdóttur kennara fóru í ferð til Reykjavíkur mánudagin 29. janúar. Pálmi Hilmarsson keyrði hópinn af stað árla morguns. Markmið ferðarinnar var að nemendur myndu kynnast fjölmiðlafræði betur, gera sér grein fyrir hversu vettvangur fjölmiðlunar er stór og í hversu mörg horn þarf að líta. Við heimsóttum RÚV, Morgunblaðið, Kvikmyndaskóla Íslands og í hádeginu var borðað á Grillhúsinu.

Fyrsti viðkomustaður ferðarinnar var RÚV (Ríkisútvarpið). Í anddyri RÚV tók á móti okkur maður að nafni Gunnar Baldursson. Í þessari heimsókn fengu nemendur að kynnast starfi RÚV allt frá fjölmiðlun til förðunar. Nemendum þótti RÚV áhugaverður starfsvettvangur, og spurðu mikið út í starfsemina. Heimsókninni í RÚV lauk laust eftir kl. 11:00. 

Fólk sem starfar við fjölmiðlun kemur alls staðar að úr samfélaginu, og hefur fjölbreytta menntun að baki. Ein leiðin inn í geirann er í gegnum Kvikmyndaskóla Íslands, þar hafa margir útskrifast úr námi sem nú starfa við fjölmiðlun. Stefán Loftsson og Sigrún Gylfadóttir sýndu m.a. búnað til myndatöku, stúdíó Kvikmyndaskólans og gerðu grein fyrir skiptingu námsins innan veggja skólans. Það kom skýrt fram að námsgráður duga ekki einar og sér til að ná árangri, heldur skiptir að minnsta kosti jafn miklu máli að orðspor einstaklinga sé gott. 

Klukkan 12.00 áttum við pantað borð á Grillhúsinu á Sprengisandi sem hentaði mjög vel þar sem margar garnir voru farnar að gaula. Á Grillhúsinu fengum við að velja okkur annað hvort hamborgara eða fisk og allir voru sáttir með matinn.  

Eftir hádegismat var ferðinni heitið í Hádegismóa en þar eru höfuðstöðvar Morgunblaðsins, sem frétta- og upplýsingamiðlunarfyrirtækið Árvakur gefur út. Þegar þangað var komið tók Svanhvít Ljósbjörg Guðmundsdóttir á móti okkur. Við fórum með henni í fundarherbergi og ræddum við hana í dágóða stund. Eftir gott spjall um störf á Morgunblaðinu og verklag þeirra sem þar vinna fengum við að skoða stúdíó útvarpsstöðvarinnar K-100. Næst fórum við yfir í prentsmiðjuna Landsprent sem prentar Morgunblaðið. Þar fengum við meðal annars að sjá stærstu prentvél á Íslandi og hvernig blöðin eru prentuð, en vélin er gríðarlega afkastamikil. Hún getur prentað sjö blöð á sekúndu. Við komumst að því að þessi vél prentar öll hverfisblöð og ýmis blöð sem eru gefin út landsbyggðunum.   

Eftir heimsóknina í Morgunblaðið var lá leiðin aftur upp á Laugarvatn. Ferðin heppnaðist vel, nemendur voru almennt áhugasamir og þau sem tóku á móti okkur voru ánægð með það. Allir komu sáttir heim eftir skemmtilegan og viðburðaríkan dag.  Myndir úr ferðinni eru hér.

Guðrún Lilja Kristófersdóttir og Þórarinn Guðni Helgason  

nemendur í fjölmiðlafræði

Nýtt vinnulag kallar á breytingar

Details

Skrifað janúar 09 2018

Mikil þróun hefur átt sér stað í Menntaskólanum að Laugarvatni í námi og kennslu um langa hríð.  Það er eðli skólastarfs að breytast og þróast meðal annars vegna þess að samfélagið er sífelldum breytingum háð.

Innleiðing nýrrar námskrár og ekki síður stytting náms til stúdentsprófs hefur kallað á enn frekari þróun og breytingar.  Í ML hefur nám og kennsla þróast meir og meir í átt til verkefnamiðaðs náms og símats.  Einn þáttur þess er breyting á skipulagi stundatöflu og vinnulags.  Á þessari önn er gerð tilraun með svonefndar vinnustundir. Þær eru í stundatöflu eftir hádegi á þriðjudögum og miðvikudögum, samanlagt 4 klukkustundir.  Í vinnustund eru kennarar í sínum stofum og leita nemendur að eigin vali til þess kennara þar sem þeir þurfa frekari aðstoðar við eða leiðbeiningar vegna síns náms.  Það er mætingaskráning skv. ákveðnu kerfi og skyldumæting.  Nemendur geta þó staldrað stutt við hjá einum kennara sínum og lengur hjá öðrum, allt eftir þörf hverju sinni að þeirra mati.  Ræður þar um eigið mat nemandans á verkefnastöðu og vinnuálagi í hverjum áfanga.  Í nánast öllum áföngum er utan vinnustunda kennsla og nám tvisvar í viku, eina og hálfa klukkustund í senn.

Foreldra/forráðamenn eru hvattir til að fylgjast vel með námi barna sinna en það má gera í gegnum aðgang þeirra að upplýsingakerfinu Innu, kennslu-og námsumhverfinu Moodle og ekki síður með uppbyggilegum samræðum og góðum tengslum.

Bent er á að sem fyrr geta nemendur sem orðnir eru lögráða veitt foreldrum/forráðamönnum sínum umboð í þá veru að engin breyting verði á fyrirkomulagi og upplýsingastreymi skólans, sem og aðgangi foreldra/forráðamanna að upplýsingakerfinu, þó nemandinn sé orðinn lögráða.  Á það einnig við m.a. um veikindatilkynningar, leyfisbeiðnir, óskir foreldra/forráðamanna um upplýsingar um námsgengi barna þeirra o.s.frv.

Skólameistari