Skólabragur

Skólabragurinn í Menntaskólanum að Laugarvatni er einstakur. Bekkjakerfið, smæð skólans, staðsetningin og heimavistin skapa umgjörð um okkar góða, nána samfélag. Andrúmsloftið í skólanum er afslappað og félagslífið er afar blómlegt.  

Nemendafélag Mímir vinnur að félags-, hagsmuna- og velferðarmálum nemenda. Nemendur geta boðið sig fram til að sitja í stjórn Mímis og sinna þar fjölbreyttum embættum félagsins. Á vegum Mímis eru haldnir margir viðburðir, s.s. kraftakeppnin ML Skessan og ML Tröllið, tónlistarviðburðurinn Diddinn, bíókvöld, Útvarp Benjamín, söngvakeppnin Blítt og létt, íþróttamót, menningarferðir og böll. Árlega er sett upp leikrit og haldin glæsileg árshátíð. Á vorin eru þemadagar, sem kallast Dagamunur, með stuttum námskeiðum og skemmtidagskrá. Dagamunur endar á Dollanum, en hann felst í þrautakeppni nemenda og starfsfólks. Félagsaðstaða nemenda er í N-stofu á fyrstu hæð skólans, með aðstöðu til að spila billjard og fótboltaspil, halda samkomur, hangsa og spila á píanó, svo eitthvað sé nefnt.

Í stjórn nemendafélagsins starfa jafnréttis- og skólaráðsfulltrúar. Lögð er áhersla á að félagslífið einkennist af virðingu og jafnrétti. Hinseginfélagið Yggdrasill var stofnað 2021. Félagið stuðlar að auknum sýnileika og fræðslu um hinsegin málefni í skólanum og stuðningi við hinsegin nemendur skólans. 

Í íþróttahúsinu á Laugarvatni eru fastir “ML-tímar” sem íþróttaformenn Mímis skipuleggja. Haldin eru bekkjarmót og hefð fyrir bekkjarbúningum á öðru ári. Hver bekkur heldur eitt bekkjarkvöld á vetri, með hátíðarkvöldverði að hætti kokksins og skemmtun sem bekkjarfélagarnir skipuleggja sjálfir. Söngsalur er einu sinni á vetri en þá fellur niður kennslustund og nemendur hittast í samsöng í holinu. Kór menntaskólans er stærsti framhaldsskólakór á landinu og í kring um hann er mikið líf og fjör. Haldnir eru viðburðir í tengslum við fjáröflun kórsins og reglulega heldur þriðji bekkur kaffihúsakvöld til að safna fyrir útskriftarferðinni. Í útivistarvali er farið í fjölbreyttar ferðir, sem er mikil upplifun. Síðast en ekki síst býður vistarlífið upp á samveru og gleði. Heimavistinni er stýrt af kærleiksríkri festu og utanumhald er afar gott.  

Með þátttöku í öflugu félagslífi öðlast nemendur mikilvæga og þroskandi reynslu. ML-ingar halda hópinn og á hverju vori, á útskriftardaginn, hittast útskriftarárgangar fyrri ára og áratuga og “júbílera” með hátíðarkvöldverði og dansleik. Margir eignast vini fyrir lífstíð í ML.