Kórbúðir í Vík

Details

Skrifað október 12 2017

Kór Menntaskólans að Laugarvatni lagði land undir fót helgina 6. og 7. október. Ferðin lá til Víkur í Mýrdal þar sem kórinn kom fram á tónleikum sem haldnir voru á Regnbogahátíðinni, lista- og menningarhátíð Mýrdælinga. Við lögðum af stað frá ML með 110 nemendur, kórpalla, hljóðfæri og kjúklingasalatið hans Svenna kokks! Föstudagurinn var skemmtilegur, við fórum beint í íþróttahúsið í Vík og æfðum fyrir tónleikana, komum okkur þá fyrir í félagsheimilinu Leikskálum, borðuðum, fórum í betri gallann og um kvöldið flutti kórinn um 45 mínútna prógram fyrir fullu húsi. Öll verk voru flutt án nótna sem verður að teljast frábær árangur eftir æfingar í aðeins einn og hálfan mánuð!

Við erum svo heppin að eiga í okkar röðum hæfileikaríkt tónlistarfólk og nokkrir nemendur kórsins komu einnig fram sem hljóðfæraleikarar. Það voru þeir Ástráður Unnar Sigurðsson á píanó, Halldór Friðrik Unnsteinsson á trommur, Hörður Freyr Þórarinsson á bassa, Sölvi Rúnar Þórarinsson á gítar og Þórarinn Guðni Helgason á bassa. Þeir stóðu sig, rétt eins og aðrir kórmeðlimir, með stakri prýði.

Eftir tónleikana var haldin kvöldvaka í Leikskálum þar sem hver rödd (sópran, alt, tenór og bassi) tróð upp með skemmtiatriði. Þessu stýrði Anna Elísabet Stark, formaður kórsins. Úr varð hin besta skemmtun, í framhaldinu voru dregin upp sönghefti og sungið og trallað langt fram á nótt... eða þar til Pálmi og Erla sögðu góða nótt!

Á laugardeginum buðu kvenfélagskonur okkur í morgunmat í grunnskólanum í Vík. Við þökkum þeim kærlega fyrir gestrisnina! Í framhaldinu hófust raddæfingar og ný lög voru æfð, þar á meðal jólalög sem sungin verða á jólatónleikum kórs ML. Þeir verða tvennir þetta árið, 30. nóvember og 1. desember, í Skálholtskirkju. 

Allt í allt heppnaðist helgin ljómandi vel! Má þar þakka Önnu Birnu Björnsdóttur verkefnastjóra Regnbogahátíðarinnar en hún stýrði af röggsemi og var okkur ML-ingum ætíð innan handar. Hún er móðir tveggja kórmeðlima, þeirra Guðrúnar Lilju og Sigurjónu. Einnig fá þakkir aðrir sem lögðu hönd á plóg, en það er mikið verk að fara með stóran hóp í helgarferð. Frá ML fóru Eyrún Jónasdóttir kórstjóri, Pálmi Hilmarsson húsbóndi og Erla Þorsteinsdóttir húsfreyja auk undirritaðar. 

Myndir segja meira en mörg orð, svipmyndir úr ferðinni má sjá hér. Þar má t.d. sjá að þétt var legið í Leikskálum en það jók aðeins á ástina!

Ég þakka ML-ingum fyrir faglega og flotta ferð!

Aðalbjörg Bragadóttir

verkefnastjóri kórs ML

Alþjóðasamtök skólastjórnenda, ICP – International Confederation of Principals.

Details

Skrifað október 04 2017

Alþjóðasamtök skólastjórnenda, ICP – International Confederation of Principals, héldu sína þrettándu alþjóðaráðstefnu í Höfðaborg í Suður-Afríku dagana 22.-25. september s.l.  Fjórir skólameistarar framhaldsskóla á Íslandi sóttu ráðstefnuna, m.a. Halldór Páll Halldórsson skólameistari ML.  Um 1.200 þátttakendur voru á ráðstefnunni, þar af 300 frá öðrum þjóðlöndum en SA eða frá 28 þjóðum.

 Yfirskrift ráðstefnunnar var „Brain Waves of Change“. Í megindráttum var fjallað um það hvað hraðvaxandi tækni kallar á í framtíðinni, um gjörbreytta nálgun í námi og kennslu, svo og ekki síður um rannsóknir á heilastarfsemi mannsins sem á sér stað við lærdóm.  Hin mjög svo hraða breyting tækninnar og þar af leiðandi náms- og kennsluumhverfis nemenda og kennara er í veldisvexti og er ekki hægt að segja fyrir um með öryggum hætti hvernig menntun þjóðir heimsins þarfnast í framtíðinni eða til hvernig starfa þarf að mennta börn, ungmenni og fólk.  Fram kom hjá mörgum fyrirlesurum að kennsla þurfi að þróast úr greinatengdri nálgun yfir í mikla samþættingu námsgreina þar sem sérhver nemandi, sérstaklega á efri skólastigum, horfi til sinna markmiða og viði að sér þekkingu úr hinum ýmsu námsgreinum til að nálgast þau markmið. Nám og kennsla þurfi að vera í mjög auknum mæli verkefnamiðuð, efla þarf samskiptahæfni ungmenna og læsi í víðtækri merkingu orðsins, læsi á orð, athafnir og umhverfi.  Með þetta í huga þurfi skólakerfi þjóða að þróast .. og breytast.

Eins var fjallað um heilbrigði, samspil tækni og heilsu, um agastjórnun eða öllu heldur um virkjun sjálfsaga hjá nemendum og starfsmönnum, um rannsóknir á heilsu skólastjórnenda, um menntakerfi og menntastefnu í Suður-Afríku og mörgum öðrum löndum. Fjallað var og um þau vandamál sem víða er verið að glíma við og leiðir til lausna þeirra svo eitthvað sé nefnt.

Fyrirlesarar voru um fimmtíu, hvaðanæva úr heiminum, fjölmargir þeirra heimsþekktir á sínu sérsviði.

Árið 2015 var 12. alþjóðaráðstefna ICP haldin í Helsinki í Finnlandi og að tveimur árum liðnum, árið 2019, verður 14. ráðstefnan haldin í Sjanghai í Kína.

Á myndinni eru þátttakendur frá Íslandi, talið frá vinstri:  Halldór Páll Halldórsson skólameistari ML, Helga Kristín Kolbeins skólameistari FÍV, Guðrún Hrefna Guðmundsdóttir skólameistari FB og Hjalti Jón Sveinsson skólameistari Kvennaskólans.

Hph