Bjöllunni var hringt til húsþings í morgun og þar fjallaði skólameistari um viðburðina sem framundan eru: Kynningardag skólans/ML-daginn og söngkeppnina Blítt og létt, en hvorttveggja verður á fimmtudag.
Að því búnu tók Þórarinn Guðni Helgason, sem er frá Gegnishólaparti í Flóa og nemandi í 2. bekk, til máls. Hann kvaðst hafa verið í leið í morgunmat dag einn í september þegar honum datt í hug, í í tengslum við annað mál, að merki skólans myndi henta vel sem klukkuskífa. Hann dreif síðan í því að búa til klukku úr ryðfríu stáli, þar sem tölvustýrt tæki skar merkið út. Að því búnu skellti hann baki úr áli á skífuna. Að loknum þessum inngangi afhenti Þórarinn skólanum klukkuna að gjöf við mikinn fögnuð viðstaddra, sem von var.
Skólameistari tók við gjöfinni og þakkaði Þórarni hlýhug í garð skólans og kvað klukkunni verða fundinn staður við hæfi.
pms
