Það er nú einu sinni svo að við þurfum ávallt að vera á varðbergi gagnvart þeirri hættu sem getur stafað af eldi eða annari vá sem getur steðjað að. Hingað til hefur það verið venja að á fyrsta vistafundi á Kös, sem er heimavist nýnema þá er sýnd mynd um bruna í herbergi. Meðan á sýningu myndarinnar stendur hefur Pálmi húsbóndi farið yfir hvernig þau eigi að bregðast við ef upp komi eldur í húsinu. Það tekur mun styttri tíma en margir halda frá því kerti leggst á hliðina í sófa þangað til verður eldsprenging í herberginu og þetta er því bæði fróðlegt og nauðsynlegt að fara yfir strax í upphafi.
Í skólahúsinu sjálfu eru svo rýmingaræfingar einu sinni á ári og stundum gert í samvinnu við slökkviliðið á staðnum sem er hluti af Brunavörnum Árnessýslu.
Síðastliðið miðvikudagskvöld var svo gengið enn lengra og æfðir margir hlutir í einu. Það var gert með þeim hætti að brunakerfið á Kös var ræst og húsið rýmt eins og rýmingaráætlun gengur út á. Þeir íbúar vistarinnar sem voru heima fóru þá út í skóla þar sem vistarverðir tóku manntal og fundu út hverja vantaði og létu húsbónda vita.
Um leið og kerfið var gangsett hringdi 112 út æfingu hjá slökkviliðinu á Laugarvatni sem kom strax á staðinn og tók til við fyrstu aðgerðir, en það var reykköfun til að ná í þá sem höfðu boðið sig fram sem sjúklinga og lágu á setustofu eða í herbergjum auk þess að byrja að sprauta á ímyndaðan eld. Boðunin náði einnig til slökkviliðsins í Reykholti, á Flúðum og í Árnesi. Þá komu einnig nokkrir frá Selfossi meðal annars á körfubíl sem var reyndur við björgun út úr herbergjum. Af hálfu slökkviliðs gekk þetta mikið út á vatnsöflun og tímatöku en við vitum nú mun betur hvernig við spilum úr þeim mannskap og tækjabúnaði sem kæmi ef á þarf að halda. Allir viðbragðsaðilar lögðu jafnt af stað frá sínum heimastöðvum þannig að æfingin var í rauntíma að öllu leyti.
Æfingin heppnaðist vel, nemendur eiga hrós skilið fyrir góða þátttöku í öllu og slökkviliðið lærði margt, bæði hvað varðar flutningsgetu veitukerfis á Laugarvatni og fleira sem lítur að vatnsöflun. Skólinn bauð slökkviliðsmönnum upp á kaffi og skúffukökur í matsal á eftir meðan farið var yfir æfinguna og honum eru færðar bestu þakkir fyrir.
Pálmi Hilmarsson
Myndir (Höfundar mynda eru þeir Hafsteinn Veigar Ragnarsson (flestar) og Pálmi Hilmarsson (nokkrar símamyndir)
